Edhe pse pritej, këto mesazhe janë mjaft të rëndësishme për Serbinë pasi Ministri i Jashtëm Ivica Daçiç pati deklaruar se kushtet e reja të vendosura nga Berlini janë të papranueshme. Por këto pretendime u hodhën poshtë si të pavërteta nga Steinmeier , i cili ndër të tjera shtoi se Gjermania, si shtetet e tjera të BE-së, është e interesuar për hapjen e kapitujtve të parë në këtë vit, në negociatat e anëtarësimit me BE-në. Pas takimeve të realizuara me zyrtarin e lartë gjerman, si Daçiç ashtu edhe kryeministri Aleksandar Vuçiç konfirmuan tone pozitive të bisedimeve.

Sipas raporteve nga mediat e Beogradit, presidenti serb Tomislav Nikoliç nuk ishte optimist në lidhje me mesazhet e Steinmeier, duke pasur parasysh faktin se "ai nuk tha në mënyrë të qartë sa kapituj negociues do të jenë hapur deri në fund të vitit". Megjithatë, ai shtoi se Steinmeier i tha atij se ai besonte se do të krijohen kushte për këtë.

Negociatat e anëtarësimit të Serbisë janë të ndryshme në krahasim me vendet e tjera. Kapitulli 35 për Çështje të tjera, do të jetë veçanërisht i rëndësishëm në negociata, si kapitujt 23 dhe 24, në lidhje me gjyqësorin dhe të drejtat themelore, e cila do të duhet të hapet në fillim të negociatave, dhe të mbetet e hapur deri në fund. Kryeministri Vuçiç u shpreh se Serbia është përgatitur për hapjen e kapitujve të parë në qershor por shtoi se kjo gjë do të varet nga Gjermania dhe vendet e tjera.
Një ndër temat kryesore të bisedimeve ishin edhe marrëdhëniet problematike me Kosovën, lidhur me zbatimin e marrëveshjes së Brukselit ndërmjet Beogradit dhe Prishtinës, si dhe vendosjen e marrëdhënieve të rregullta me Kosovën.

Ministri gjerman e përgëzoi Serbinë për kontributin e saj në përpjekjet drejt normalizimit të marrëdhënieve duke shprehur shpresën se Komisioni Europian do të kontribuojë në normalizimin e marrëdhënieve mes Beogradit dhe Prishtinës. Ndërsa Kryeministri Vuçiç tha se çështja e hapjes së negociatave të anëtarësimit nuk lidhet me reformat e vendit të tij, por me normalizimin e marrëdhënieve me Prishtinën. Pavarësisht zotimit për mosnjohjen e pavarësisë së Kosovës, garantoi angazhimin e Serbisë për vendosjen e marrëdhënieve racionale dhe të arsyeshme me ata që mendojnë ndryshe, përmes dialogut.

Edhe pse marrëdhëniet ndërmjet Gjermanisë dhe Serbisë u cilësuan si më të mira se asnjëherë më parë, qëndrimet e kundërta lidhur me situatën në Ukrainë si edhe me sanksionet ndaj Rusisë paraqesin një problematikë në marrëdhëniet bilaterale.
                                                                                                                                   EurActiv, prill 2015